சென்னை:
தி.மு.க. முன்னாள் அமைச்சர் கே.என்.நேரு மற்றும் அவரது சகோதரர் ரவிச்சந்திரனுக்கு சொந்தமான 19 இடங்களில் லஞ்ச ஒழிப்புத்துறை போலீசார் இன்று (சனிக்கிழமை) காலை முதல் அதிரடி சோதனை நடத்தி வருகின்றனர்.
கடந்த திமுக அரசில் அமைச்சராக இருந்தவர் கே.என்.நேரு. தற்போது எதிர்க்கட்சித் துணைத் தலைவராகவும் இருந்து வருகிறார். திமுகவின் முன்னணி நிர்வாகிகளில் ஒருவராகவும் கே.என்.நேரு திகழ்கிறார்.
சென்னை மயிலாப்பூரில் உள்ள கே.என்.நேரு இல்லம், திருச்சி தில்லை நகரில் உள்ள கே.என்.நேரு இல்லம் மற்றும் சென்னை அபிராமபுரத்தில் உள்ள கே.என்.நேரு சகோதரரின் இல்லம் ஆகியவற்றில் லஞ்ச ஒழிப்புத் துறையினர் சோதனை மேற்கொண்டு வருகின்றனர். நான்கு வாகனங்களில் வந்த அதிகாரிகள் சோதனை நடத்தி வருகின்றனர். திருச்சி தில்லை நகர் இல்லத்தில் கே.என்.நேரு தற்போது உள்ளார்.
சோதனை தொடர்பாக கே.என்.நேரு வெளியிட்டு பதிவில், ஐகோர்ட்டில் வழக்கு நடந்து கொண்டிருக்கிறது; சட்டமன்றக் கூட்டத்தொடரும் நடந்துகொண்டிருக்கிறது. இந்நிலையில், முழுக்க முழுக்க அரசியல் காரணங்களுக்காகவே கழக முதன்மைச் செயலாளர் கே.என். நேரு மீதான சோதனை நடவடிக்கையைத் த.வெ.க. அரசு மேற்கொண்டுள்ளது.
ஆட்சி அமைக்க மற்ற கட்சிகளின் சட்டமன்ற உறுப்பினர்களை ராஜினாமா செய்ய வைத்து, சட்டமன்ற வளாகத்திலேயே அவர்களைத் தம் கட்சியில் சேர்த்ததையும் குதிரை பேரம் நடத்தியதையும், அது தொடர்பான புகார்களில் லஞ்ச ஒழிப்புத்துறை முதல் தகவல் அறிக்கையைக் கூட பதியாததையும் தமிழ்நாட்டு மக்கள் நன்கறிவர்.
இந்திய ஐனநாயகத்தின் இருண்ட பக்கமாய் இந்தப் போக்கு தொடரும் நிலையில் வழக்கம்போல் திசைதிருப்பும் நடவடிக்கையைக் கையில் எடுத்துள்ளது இந்த ரீல்ஸ் அரசு. கே.என்.நேருவும், கழகமும் புதிய அரசின் இத்தகைய பூச்சாண்டிகளுக்கெல்லாம் அஞ்சிட மாட்டோம். சட்டத்தின் வழியில் அனைத்தையும் எதிர்கொண்டு வெல்வோம் என்று தெரிவித்துள்ளார்.