சென்னை:
சென்னை மெரினா கடற்கரையில் இன்று முதல் 11ம் தேதி வரை பீச் வாலிபால் போட்டி நடைபெறுகிறது.
இதுதொடர்பாக தமிழ்நாடு விளையாட்டு மேம்பாட்டு ஆணையம் வெளியிட்டுள்ள செய்திக்குறிப்பில், முதலமைச்சர் கோப்பை- 2023 மாநில அளவிலான போட்டிகள் சென்னையில் 17 இடங்களில் ஜுலை 1-ந் தேதி முதல் தொடங்கி நடைபெற்று வருகிறது. மாவட்ட அளவிலான போட்டிகளில் வெற்றி பெற்ற 38 மாவட்டங்களை சேர்ந்த 27,000-க்கும் மேற்பட்ட வீரர் மற்றும் வீராங்கனைகள் மாநில அளவிலான விளையாட்டுப் போட்டிகளில் பங்கேற்று விளையாடி வருகின்றனர். இந்தப் போட்டிகள் ஜுலை மாதம் 25-ந் தேதி வரை நடைபெறுகிறது.
சென்னை மெரினா கடற்கரையில் இன்று (8ம் தேதி) முதல் 11ம் தேதி வரை தினமும் மாலை 4 மணி முதல் பீச் வாலிபால் போட்டிகள் நடைபெறுகிறது. இந்தப் போட்டிகளில் மண்டல அளவில் வெற்றி பெற்ற பள்ளி மற்றும் கல்லூரி மாணவ & மாணவிகள் அணிகள் பங்கேற்க உள்ளனர். பள்ளி மாணவ & மாணவிகள் பிரிவில் தலா 18 அணிகளும் கல்லூரி மாணவ & மாணவிகள் பிரிவில் தலா 18 அணிகளும் விளையாடுகின்றன. இந்த போட்டிகளை காண அனைவருக்கும் அனுமதி இலவசம் என்று குறிப்பிடப்பட்டுள்ளது.