புதுச்சேரி – பாரதி வீதியிலுள்ள பழம்பெருமை வாய்ந்த காமாட்சி அம்மன் திருக்கோயிலுக்குச் சொந்தமான நிலத்தை போலி பத்திரங்கள் வழியே அபகரித்த வில்லியனூர் சார் பதிவாளர் உட்பட 13 பேர் இதுவரை சி.பி.சி.ஐ.டி. காவல்துறையினரால் கைது செய்யப்பட்டுள்ளனர். ஆனால், அரசு அதிகாரிகளுக்கு ஆணையிட்ட மேல் அதிகாரிகளோ, இதற்குப் பின்னணியாகச் செயல்பட்ட அரசியல்வாதிகளோ இதுவரை கைது செய்யப்படவில்லை!
குறிப்பாக, மாவட்டப் பத்திரப் பதிவாளர் இரமேஷ், வட்டாட்சியர் பாலாஜி உள்ளிட்ட அரசு அதிகாரிகளைக் கைது செய்து விசாரிக்க வேண்டும். அதேபோல், கோயில் நிலத்தை தனது குடும்பத்தினரின் பெயரில் அபகரித்துக் கொண்டுள்ள பா.ஜ.க. சட்டமன்ற உறுப்பினர்கள் ஜான்குமார் மற்றும் அவரது மகன் ரிச்சர்ட்ஸ் ஜான்குமார் ஆகியோரைக் கைது செய்து விசாரிக்க வேண்டும்.
என்ற கோரிக்கைகளை வலியுறுத்தியும், சட்டமன்ற உறுப்பினர்கள் ஜான்குமார் மற்றும் ரிச்சர்ட்ஸ் ஜான்குமாரின் குடும்பத்தினர் பெயரில் கோயில் நிலம் வாங்கப்பட்டது குறித்த ஆவணங்களை வெளியிட்டும், இன்று செவ்வாய் (04.07.2023) காலை 11 மணியளவில், புதுச்சேரி மாவட்ட ஆட்சியர் அலுவலகம் முன்பு, தெய்வத் தமிழ்ப் பேரவை சார்பில் ஆர்ப்பாட்டம் நடைபெற்றது.
ஆர்ப்பாட்டத்திற்கு, தெய்வத் தமிழ்ப் பேரவை புதுச்சேரி ஒருங்கிணைப்பாளர் சிவ. மு. இராசாராம் தலைமை தாங்கினார். தே. சத்தியமூர்த்தி (தெய்வத் தமிழ்ப் பேரவை), அசோக்ராசு (புதுச்சேரி தெற்கு, செயலாளர், தமிழ்த்தேசியப் பேரியக்கம்), முருகன் (தொரவி செயலாளர், த.தே.பே.), குமார் (ஐவேலி கிளைச் செயலாளர், த.தே.பே.) ஆகியோர் முன்னிலை வகித்தனர்.
தமிழ்த்தேசியப் பேரியக்கத் துணைப் பொதுச்செயலாளரும், தெய்வத் தமிழ்ப் பேரவை – செயற்குழு உறுப்பினருமான க. அருணபாரதி கண்டன உரையாற்றி, கோயில் நில விற்பனை தொடர்பான ஆவணங்களை வெளியிட்டார்.
நாம் தமிழர் கட்சி – புதுச்சேரி பொருளாளர் இளங்கோவன், புதுவை மாநில விஸ்வகர்ம மகாஜன சங்கம் தலைவர், பா. சண்முகம், (புதுச்சேரி தலைவர், தமிழர் களம்) கோ. அழகர் , ச. மூர்த்தி (தலைவர், விஸ்வகர்ம முன்னேற்றக் கழகம்), இரா. முருகானந்தம் (தலைவர், மனித உரிமைகள் மற்றும் நுகர்வோர் பாதுகாப்புக் கழகம்), ஆர். மோகனசுந்தரம் (தலைவர், அகில இந்திய மனித உரிமைகள் கழகம்), து. இரமேசு (புதுச்சேரி செயலாளர், நாம் தமிழர் – தொழிலாளர் நலச்சங்கம்), ஜெ. தனாளன் (பொதுச்செயலாளர், கைவினைஞர் வாழ்வுரிமைக் கட்சி) உள்ளிட்ட பல்வேறு அமைப்பினர் பங்கேற்றனர்.
தமிழ்த்தேசியப் பேரியக்க புதுச்சேரி செயலாளர் இரா. வேல்சாமி ஆர்ப்பாட்டத்தை ஒருங்கிணைத்தார். தெய்வத் தமிழ்ப் பேரவை செயற்குழு உறுப்பினர் வழக்கறிஞர் சுபாஷ் சந்திரபோஸ் நன்றி கூறினார். இவ்வார்ப்பாட்டத்தில், திரளான மெய்யன்பர்கள் பங்கேற்றனர்.
