மயிலாப்பூரின் வெங்கடேச அக்ரஹாரம் தெருவில் சாய்பாபா கோவில் உள்ளது. இந்தக் கோயில் சென்னையில் உள்ள பிரசித்தி பெற்ற கோவில்களில் ஒன்றாக இருக்கிறது. குறிப்பாக வியாழக்கிழமைகளில் அதிக பக்தர்கள் வருவார்கள். பொதுமக்கள் முதல் முக்கியப் பிரமுகர்கள் வரை சாய்பாபா கோவிலில் வழிபடச் செல்வார்கள். தற்போது அங்கு கோபுரக் கட்டுமானப் பணிகள் நடக்கிறது. இந்த நிலையில் நேற்று தீபாவளி பண்டிகை கொண்டாட்டத்தின்போது, வெடிக்கப்பட்ட ராக்கெட் பட்டாசு ஒன்று கோபுரக் கட்டுமானப் பணிக்காக அமைக்கப்பட்டிருந்த ஓலை மறைப்பின் மீது விழுந்தது. அப்போது ஓலையில் தீப்பிடித்து எரிந்தது. அப்பகுதி மக்கள உடனடியாக தீயணைப்புத் துறையினருக்குத் தகவல் தெரிவித்தனர்.
தகவல் அறிந்ததும் மூன்று தீயணைப்பு வாகனங்கள் விரைந்து சம்பவ இடத்தை அடைந்தன. கோபுரத்தின் மீது தண்ணீரைப் பீய்ச்சி அடித்தனர் சுமார் அரைமணிநேரப் போராட்டத்துக்குப் பின் தீ அணைக்கப்பட்டது. சீக்கிரம் தீ அணைக்கப்பட்டதால், தீ பரவாமல் கட்டுப்படுத்தப்பட்டது. இந்த தீ விபத்தில் யாருக்கும் எந்த பாதிப்பு ஏற்பட்டதாகத் தகவல் இல்லை. தீபாவளிக் கொண்டாட்டத்தின்போது சாய்பாபா கோவில் அசம்பாவித சம்பவம் நடைபெற்றது அப்பகுதி மக்களிடையே மன வேதனையை ஏற்படுத்தியுள்ளது.
